Genesis 49

UJakhobe Ubusisa Amadodana Akhe

1UJakhobe wabiza amadodana akhe wathi, “Sondelani eduze ngilitshele lokho okuzakwenzakala kini ezinsukwini ezizayo.

2“Buthanani lilalele, madodana kaJakhobe, lalelani kuyihlo u-Israyeli.

3“Rubheni, ulizibulo lami, amandla ami, isitshengiselo sokuqala samandla ami, uyindlula ngodumo, uyindlula ngamandla akho.

4Uyaqubuka njengamanzi, kawusayikuba yindlula, ngoba wakhwela embhedeni kayihlo, phezu kwesandlalo sami wasitshaphaza.

5“USimeyoni loLevi bayizelamani – izinkemba zabo yizikhali zodlakela.

6Mangingangeni enkundleni yabo, mangingene emhlanganweni wabo, ngokuba bababulala abantu ngokuthukuthela kwabo izinkabi baziquma imisipha santando.

7Luqalekisiwe ulaka lwabo, lwesabeka kubi, lentukuthelo yabo, ilesihluku esibi! Ngizakubachithiza kuJakhobe, ngibahlakaze kuIsrayeli.

8“UJuda, abafowenu bazakubabaza; isandla sakho sizakuba sentanyeni yezitha zakho; amadodana kayihlo azakukhothamela.

9Ungumdlwane wesilwane, O Juda; uvela ekujimbeni, ndodana yami. Njengesilwane uyacathama alale phansi, njengesilwanekazi – ngubani olesibindi sokumhlokoza?

10Intonga yobukhosi kayiyikusuka kuJuda, loba umqwayi wombusi phakathi kwezinyawo zakhe, aze ayofika kumnini wayo lokulalela kwezizwe kukuye.

11Uzathekeleza ubabhemi wakhe evinini, ithole likababhemi wakhe ogatsheni oluhle; uzagezisa izambatho zakhe ngewayini, izigqoko zakhe egazini lamagilebisi.

12Amehlo akhe azathuba okudlula iwayini, amazinyo akhe abe mhlophe kulochago.

13“UZebhuluni uzahlala ekhunjini lolwandle abe litheku lemikhumbi; umngcele wakhe uzaqhelela eSidoni.

14“U-Isakhari ulithambo likababhemi elilohlonzi elele ephahlwe ngamasaka amabili emithwalo.

15Uthi nxa ebona ubuhle bendawo yakhe yokuphumula kuyo lokubukeka kwelizwe lakhe, uzaqinisa ihlombe lakhe ukuthwala umthwalo azimisele umsebenzi wesibhalwa.

16“UDani uzakwahlulela kahle abantu bakibo abangabanye bezizwana zako-Israyeli.

17UDani uzakuba yinyoka esemgwaqweni, inhlangwana elele endleleni, eluma izithende zebhiza umgadi walo atshelele aye emuva.

18“Ngilindele ukuhlenga kwakho, O Jehova.

19“UGadi uzahlaselwa liqula lamanxusa, kodwa uzabahlasela bamuphe izithende zabo.

20Ukudla kuka-Asheri kuzakuba ngokunonileyo, uzakupha izicoco ezifanele inkosi.

21“UNafthali yimpalakazi ekhululiweyo ezala amazinyane amahle.

22“UJosefa ulivini elithela kakhulu, ivini elithela kakhulu eduze komthombo, elimagatsha alo akhwela emdulini.

23Abahlaseli bemitshoko bamhlasela ngolaka; bamciba ngenzondo embi.

24Kodwa kawalazelanga ngedandili lakhe, izingalo zakhe eziqinileyo zala zilokhu zikhukhumele, ngenxa yesandla sikaSomandla kaJakhobe, ngenxa kaMalusi, iDwala lika-Israyeli,

25ngenxa kaNkulunkulu kayihlo, okusizayo, ngenxa kaSomandla okubusisayo ngezibusiso zasezulwini ngaphezulu, izibusiso zolwandle olungaphansi, izibusiso zebele lesizalo. 26Izibusiso zikayihlo zinkulu kulezibusiso zezintaba zekadeni, kulezithelo zamaqaqa adabuka endulo. Zonke lezi kazehlele ekhanda likaJosefa, ebunzini lenkosana phakathi kwabafowabo.

27“UBhenjamini yimpisi ephangayo; ekuseni uyayiqhoboza impango, ntambama ayabe impango.”

28Zonke lezi yizizwana ezilitshumi lambili zako-Israyeli, njalo yikho lokho uyise akutsho kubo lapho wayebabusisa, esipha lowo lalowo isibusiso esimfaneleyo.

Ukufa kukaJakhobe

29Yikho wasebanika imilayo le: “Sekusondele ukuba ngimbelwe ebantwini bakithi. Lingimbele labokhokho ebhalwini ensimini ka-Efroni umHithi, 30ubhalu olusensimini kaMakhaphela, eduze leMamure eKhenani, eyathengwa ngu-Abhrahama kanye lensimu leyo ku-Efroni umHithi, ukuba yindawo yokungcwaba.

31Khonapho kwambelwa u-Abhrahama lomkakhe uSara, kwembelwa u-Isaka lomkakhe uRabheka, njalo khonapho ngambela uLeya.

32Insimu kanye lobhalu oluphakathi kwathengwa kumaHithi.”

33Kwathi uJakhobe eseqedile ukunika imilayezelo emadodaneni akhe, wakhweza izinyawo zakhe embhedeni, waphefumula okokucina, waya kwabakibo.